BATAGAK PANGULU (2)

UPACARA MALEWAKAN GALA

 Muhammad Nasir

Pelaksanaan Upacara Menegakkan Pangulu atau Melewakan Gala. Untuk peresmian pengangkatan calon Pangulu, ada beberapa tahapan prosesi kegiatan, yaitu:

Pertama Jamuan Seisi Nagari dengan maksud agar gelar itu dapat diketahui oleh pihak umum. Kegiatan jamuan isi nagari ini diawali dengan mengisi adat yaitu 1) manurunkan jamua, artinya mengeluarkan padi dari rangkiang, 2) mambantai kabau, 3) Mamanggia alek nagari, 4) alek manjamu sesuai dengan kaidah adat: Darah sama dikacau, tanduk sama ditanam, daging sama dimakan, adat diisi limbago dituang.

Kedua Malewakan Gala. Acaranya terdiri dari 1). Pasambahan mandudukan alek, 2) Sirih Pinang, 3). pasambahan malewakan Gala penghulu, 4) Pidato melewakan penghulu baru disampaikan oleh penghulu sepasukuan yang isinya antara lain meminta hadirin agar penghulu baru dibawa sehilir semudik atau bekerjasama dengan penghulu yang lain.

Ketiga Pemasangan Saluak. Saluk pusako dipasangkan ke kepala penghulu baru oleh penghulu pucuak dari penghulu sepasukuan, dan menyisipkan sebilah karih di pinggang penghulu baru tersebut.

Keempat Pegucapan sumpah satiah oleh Pangulu yang baru diresmikan.

Kelima Pembacaan Do’a

Pidato Malewakan Gala Pangulu

Assalamu’alaikum Warahmatullah Wabarakatuh

Minta ampunlah hambo pado Allah,

maaf diminta ka nan banyak, niniak mamak panghulu,

nan gadang basa batuah, nan bapucuak subana bulek,

nan baurek subana tunggang,

alim ulama jo tuanku, cadiak pandai pagaran kokoh,

dubalang jo ampang limo, jo manti pagawai adat,

nan mudo arih budiman, bundo kanduang samo di dalam.

Manyurek di ateh pintu, mangarang di tapak tangan,

malompek nak basitumpu, mancancang nak balandasan, di Datuak [gala datuak] tibonyo sambah.

Sakali ambo maimbau, sapatah rundiang nan lalu,

walau datuak surang nan di imbau,

batin dek adat kasadonyo, pangana batin ka nan rapek, ujuik sambah ka nan banyak, saujuik sambah jo simpuah.

Sabarek bungka nan piawai, naraco luruih main daun,

indak basibak jo basisiah, bukan bahinggo jo babateh.

Apolah nan ka ambo pasambahkan, si joroang manggali lambah, mamakai baju biludu gandum,

kok tadorong ambo manyambah, sakali gawa baribu ampun.

Dirandang randang dimasak, dikirai kirai dipapa,

tatangguak ikan gulamo, dibilang bilang dipapakan,

dicurai sitambo lamo, nan satitiak bapantang hilang,

nan sabarih bapantang lupo, kok hilang curiang di batu tulisan limbago tingga juo.

Takalo maso dahulu, di musim maso saisuak,

katiko langik basintak ka ateh, katiko bumi basintak turun,  Nabi Adam Hawa patamu, Nabi Nuh rasul kaduo,

mako tajadi di tanah kuniang,  ta antak ka tiang Arrassy, taeda ateh kurisi, batabua intan podi, baparmato intan biduri, ba aleh jo kain suto, suto banamo ainul banat tanunan anak bidodari,

dalam sarugo tujuah pangkek

Kurisi kadudukan nan dipertuan,daulat sultan iskandar zulkarnaini,

anak Syis alaihissalam,anak adam nan kurang aso ampek puluah. mako batiuik angin si dolak dolai, babuni gandang jo sarunai  Sarato rabab jo kacapi, sagalo buni-bunian dalam sarugo.

takambang payuang ubua-ubua,tando alamat basuko hati, kawin jo anak rajo ruhun. dek taat takadia allah. Allah taala kayo sungguah, dapek lah anak tigo urang,

laki laki nan tuo maharaja alih, turun bakuaso di banua ruhun,  nan tangah banamo maharaja dipang, turun ka banua tanah cino. Nan bungsu maharajo dirajo, turun ka pulau ameh paco nan ko.

 

Manuruik curito tambo alam,pihak di sutan maharaja dirajo, taniat dalam hati, tacinto dalam kiro-kiro,balaia nyo maso itu  di ateh dandang nan sabuah, sarato urang nan banyak, cukuik nan tuo cadiak pandai,datuak suri dirajo,sarato cati bilang pandai, nan datang dari nagari basa, ikuik  jo puti indo jalito.

Dek lamo dandang balaia,di dalam lawuik baharullah,

tampaklah api takijok-kijok,di ateh puncak langkapuri,

gunuang suatu maso itu,banamo gunuang marapi,

biroari maharaja dirajo, kapado cati bilang pandai,

ditujukan dandang ka sanan.di tuju nyo cahayo lah hilang, galok gulito maso itu, tadampa dandang di sanan, di ateh puncak gunuang marapi.

 Di mano titiak palito,di pucuak teloang nan batali,

dari mano asa niniak kito iyo di puncak gunuang marapi.

sirawuik bari bahulu, diasah baru bamato,

lau tan sajo dahulunyo,barulah ado pulau paco.

sinan sirangkak nan badangkang, sarato buayo putiah daguak, di bawah batu hampa putiah, di bukik patah patigo, itulah bukik patah sambilan, nan banamo bukik si guntang-guntang,bukik nan tidak barangin, lurah nan tidak baraia.

Di sinan bintuak nan barayun,di bawah labuhan

si timbago, dakek ligundi nan baselo.dek niniak moyang maso itu,dibuek dusun jo taratak, sabalun bakoto jo banagari, di buek sawah gadang satampang baniah, makanan urang tigo luak, sarato rumah dengan tanggo.

Dek lamo musim bajalan, alam batambah leba juo,

urang batambah kambang pulo, dibuek adat dikarang undang-undang,  disusun tangkai ciek-ciek,dibubuah di kabek arek, di pakukan ka tiang panjang.

Dibuek adat ampek rupo, partamo suri jo tuladan,

kaduo ukua dengan jangko,ka tigo barih jo balabeh,

ka ampek cupak dengan gantang. dikarang undang-undang nan ampek, undang luak dengan rantau,

luak dibari bapanghulu,rantau diagiah barajo.

nan sakonyo turun tamurun, pusakonyo jawek bajawek, sampai sakarang iko kini.

Urang padang mahanyi banang, dikumpa mako dilipek, dilipek lalu dipatigo,kok dirantang namuah panjang, elok dikumpa naknyo singkek,singkek sakiro ka paguno.

ujuik sambah buah rundiangan, nyato tawalak ka ukuran, tabayang barih jo balabeh, bana bak andai kato bida, dek curiang barih dahulu, dek andai pusako lamokalo basiang di nan tumbuah, jokok manimbang di nan ado, tumbuah sakarang iko kini…….

Ramo-ramo si kumbangjati, katik endah pulang bakudo, patah tumbuah hilang baganti, pusako lamo baitu juo. biriak-biriak tabang ka samak, dari samak ka halaman, patah sayok tabang baranti, tasuo di tanah bato. dari niniak turun ka mamak, dari mamak ka kamanakan, patah tumbuah hilang baganti, pusako dibao dek nan mudo.

adaik pulai bapangkaik naiak, maninggakan Ruweh jo buku manusia bapangkek turun,maninggakan adat jo pusako. mati datuak baganti datuak, nan gala tatap bak samulo.

Tantangan wajah sarupo iko, lah bulek aia ka pambuluah,  lah bulek kato ka mufakat, bulek lah buliah di golekkan, pipiah lah buliah dilayangkan.

tibo di adaik lah baiak,

kalau limbago samo di tuang, tanduak lah samo di tanam, darah sudah dikacau, dagiang lah samo dilapah, manuruik adaik nan bapakai, kok ketek banamo [sebutkan namanya]  kini bagala datuak (sebutkan gelarnya]

Tantangan limbago nan bak itu, dek ketek banamo [sebutkan namanya] kini bagala datuak (sebutkan gelarnya] iyo nan samo sahamparan, samo sahilia  jo samudiak, hutang nan kamambaia, piutang nan kamanarimo, kusuik nan kamanyalasai, karuah nan kamanjaniahi. nak bahimbaukan di pakan nan rami,  dilewakan di labuah nan golong, kapado urang di nagari.

Sadundun barabah dengan nyo  balam, sikok barulang pai mandi, sadundun sambah dengan salam, Kato diharok  dibuni, sekian sajo sambah pado datuak

Sumpah Pangulu

Asyhadu an La Ilaha Illa Allah, wa Asyhadu anna Muhammadan Rasulullah. A’uzubillahi minasy Syaithani-r-Rajiim, Bismillahi al rahman al Rahim.

1. Demi Allah, ambo basumpah akan mahukum adia, bakato bana, mamaliharo koron g jo kampuang, sarato koto jo nagari.
2. Demi Allah, Ambo basumpah, akan manuruikalua nan luruih, manampuah jalan nan pasa.
3. Demi Allah, Ambo basumpah,akan mamaliharo harato pusako, adat jo bangso, sasuai kahandak Allah nan maha aso.
4. Demi Allah, Ambo basumpah, kusuikmanyalasai, karuah manjaniahkan dalam barih mungkin jo patuik.
5. Demi Allah, Ambo basumpah, akan mamaliharo anak kamanakan, sarato rakyaik dalam nagari
6. Demi Allah, Ambo basumpah, akan salalu saba jo tawakal, baalam lapang bapadang laweh.
7. Demi Allah, Panghulu sabuah hukum, urang tuo saundangundang, sakato lahie jo bathin, sasuai muluik jo hati, amanat samo dipacik, lkara samo diuni.
8. Demi Allah, jikok sumpah indak ambo tapati, janji indak ambo muliekan, kaateh indak bapucuak kabawah indak baurek di tangah·tangah digiriek kumbang, bak karakok tumbuah dibatu, hiduik sagan mati tak amuah, kanai kutuak kalamullah, kanai sumpah biso kawi.

Wassalamu’alaikum warahmatullahi wabarakatuh