Ujang Lento Pulang Kampuang

Ujang Lento Pulang Kampuang

Muhammad Nasir

Tibo di rumah rang gaek no, Ujang Lento basorak gadang, “Yes! Aden pulang kampuang!”. Ndak tangguang gadang ati no. Pamerantah memang malarang para perentau Minang pulang kampuang untuak samantaro wakatu. Maklum musim korona. Jan sampai para perantau manjadi agen nan mambao virus kalera, eh korona tu ka kampuang. Sabab, Jakarta tampek rantau Ujang Lento memang sarang korona. Mantun kecek berita.

Sajak sampai di rumah biyai no, Ujang Lento mahanok sajo di dangau durian. Isolasi diri.  Untung lai ka mujua, Ujang Lento mandapati durian sadang rareh mararak galeh. Wak no iyo patuah sen ka parentah ketua pamuda nagari nan umua no ampia limo puluah. Di telepon, Tan Rajo ketua pemuda tun mangecek an, kok iyo ang ka pulang jang, ang iyo harus bakuruang, isolasi mandiri agak ampek baleh hari. “Lai jaleh diang?” kecek Tan Rajo. “Jadih da, aman du,” jawek Ujang Lento sangkek tu. “Pulang paja gai?, tanyo Tan Rajo baliak. “Indak da. Wak den surang sen no,“ jawek Ujang Lento

Memang agak aneh, urang rantau isolasi mandiri, nan lapau sasudah sumbayang Isya tatap rami. Nan sumbayang tarawiah di surau lah ndak buliah lai. Tapi ado juo nan mada ciek-ciek. Amai-amai jo babarapo urang tatap sumbayang tarawiah. Dimatianno lampu surau, tingga lampu kicin galok-galok tangguang. Baitu pulo masin toa. sumbayanglah mereka sarupo biaso. Nan Ujang Lento pai kalapau.  

Memang ndak siagak sulik no usaho untuak pulang kampuang. Pak Presiden jo Najwa Shibab sampai bagaleboh lo masalah arati Mudik jo Pulang Kampuang. Nan di Bandara baitu pulo. Susah pulang. Tapi kalua niat lai ado saribu jalan pasti di tampuah untuk naik kapa tambang,” kecek Ujang Lento ka urang salapau salapeh ampek baleh hari maso isolasi mandiri.

“Nan, urang Minang ko iyo mode tu, harus banyak aka,” jawek Mak Pado Sain. “Haa’..ambiak an lah paisok untuak den Jang, kecek mak Pado. Iyo agak tagalenjek Ujang Lento. Ndak lamo sudah tu, nan lain lah mulai pulo mamasan  te talua, rokok sampurna, jisamsu dan ntah roko a pulo lai. Agak badabok-dabok darah Ujang Lento samaso tu. “Lah kacabiak pulo isi saku den ko mah,” rutuak no dalam ati. Caritopun berlanjut.

Ujang Lento beberapo taun terakhir memang sadang naik daun. Namo no tersiar arun di group WA kampuang. Nan wak no iyo ado lo di dalam group tu. Kadang-kadang dipostingno fotono sadang basamo jo urang-urang gadang Jakarta. Kadang foto no sadang di papua, singapur, batam, istana merdeka dan Wakanda gai. Nan kecek no, inyo karajo sabagai konsultan politik di Jakarta.

Ujang Lento memang talen. Sajak sikola memang lah cadiak, lah Nampak ka jadi mancik, eh ka jadi urang. Kabano Ujang Lento alah salasai lo sikola S2. Kiniko sadang bakuhampeh lo manyalasaian S3. Di group kanti no acok batanyo, untuak a sikola dotor lai? Kecek Ujang Lento, sikola ko sampai mati. Sebagai konsultan awak ndak buliah tampak bodoh, sakurang-kurang no, gala dotor paralu juo untuk manaiak an harago.

Sasudah manyapo suaok kida, mampabasoi urang sabalik, suasana lapau mulai saleso untuk maota-ota.

“Jadi, lah ang kicuah sen urang di bandara Jang?” tanyo Mak Pado Sain.

“Kicuah baa lo go mak?” jawek Ujang Lentoh sambia galak sengeang. Tapi dalam ati, yo agak gadang juo ati no disabuik mangicuah dalam urusan itu.

“Baa, ka indak, lah jaleh urang ndak puliah pulang, ang pulang juo. Kecek ang, ang urang cadiak. Tapi nan urang ang aka-akai juo. Parangai lamo lai bapakai juo mah iah”, kecek Mak Pado Sain baliak.

“Hahaha, kan itu lah mak. Awak kan mauji-uji. Iyo lai sabana no aturan pamarentah ko. Tapi, tulah kiri no. nan awak lalu juo” jawek Ujang Lento

“Tu, bara lo ang tabia? Kaba no ado lo urang manjua surek kasehatan bagai?” tanyo mak Sain baliak

“Haa, lai ndak pakai itu do mak. Nan awak lai pakai dekingan. Ambo lai bakatauan jo komisaris kapatabang tu, urang awak. Sudah tu, lah tibo sen urang bandara manjapuik ambo. Diiriangan no sakali sampai naik kapa tabang.” Kato Ujang Lento manjalehan. “Raso no, iyo lapang bana jalan de tampuah salamo ko mak,” carito Ujang Lento.  

“Yo santiang ang Jang. Anak den nan di Jakarta ndak dapek pulang. Kadai no di Tanah Abang lah batutuik. Ndak tantu Padok no kini lai. Kapulang ndak bisa lo.” kecek mak Pado Sain sambia maetong-etong kasau.

Nan Ujang Lento ko adolah murik sasaran silek Mak Pado Sain. Anak Mak Pado Sain nan manggaleh di Jakarta tu adolah kawan Ujang Lento. Sajak kaciak sampai kuliah di Padang. Tapi Armansyah Sain, anak mak Pado Sain ko labiah suko manggaleh kain di Tanah Abang. Ujang Lento nan banamo asli Doni Marlen tau bana kakobeh guru no ko.

Sabalun Mak Pado Sain batanyo banyak, bagageh lah wak no minta daulu kalua dari lapau. Dibayia no lah sagalo utang urang salapau samalam tu. Rokok, kupi, te talua jo karupuak lento bagai. Alu takilek lah takalam. Kok nyampang batanyo mak Pado Sain ka Ujang Lento, “Lai basuo ang jo si Ar (Armansyah) di Jakarta?” A lah ka jawek Ujang Lento.

Tahun lalu, Mak Pado Sain lah mambae sudu-sudu ati Ujang Lento. Kabatulan Si Ar ndak juo pulang kampuang, Jalang rayo, urang sadang rami bajua bali. Mak Pado Sain lai sempat mangirim WA ka Ujang Lento. “Jang, kok lai lapang wakatu, singgahan lah si Ara gak sabanta ka Tanah Abang.” Lai dijawek dek Ujang Lento. Sudah tu lah batalepon-talepon lo si Ujang ko jo si Ar. Sahari sabalun rayo, Si Ujang Lento lah tibo di rumah. Singgah lo kalapau galak mangakah.

“Jadi ang singgah ka tampek si Ar?” tanyo Mak Pado Sain sangkek tu. “Ndeh Mak, ndak talakik do mak. Sabab ambo iyo babalik lalu ka Jakarta, Singapur, Kuala Lumpur, Kualanamu baru ka Katapiang. Bari maaf ambo mak,” jawek Ujang Lento.

“Iyo lah Jang. Lai Paham den!” jawek Mak Pado Sain. Sudah tu Mak Pado Sain aniang sen di lapau sampai pukua sabaleh. Sudah tu kalua lo no dari lapau. Tabayang di Mak pado Sain status facebook si Ujang Lento, OTW JKT-PDG.

Pungguang Ujang Lento sakutiko bapaluah gadang. Sasudah Mak Pado Sain kalua dari lapau, bagageh lo Ujang Lento pulang. Tabayang-bayang di palupuak matono pakirinan Si Ar untuk apak no nan lah dikabek di dalam karton supermi. Gara-gara gengsi ko ha!  [*]